Áhrif hugarþjálfunar á hugræna færni og frammistöðu

Höf: Hallur Hallsson

​

Rannsóknir í íþróttasálfræði hafa sýnt að hugarþjálfun getur haft áhrif á hugræna færni, kvíða, sjálfstraust og frammistöðu. Í þessari rannsókn voru áhrif kvíðastjórnunar, athyglisstjórnunar, skynmyndanotkunar, markmiðssetningar, sjálfstals og hugrænnar áætlunar á kvíða, sjálfstraust, keppnisskap og frammistöðu í hlaupaprófi skoðuð. Úrtakið var 44 piltar á aldrinum 15-16 ára. Í grunnlínumælingu svöruðu þátttakendur eftirfarandi sex sjálfsmatslistum: CSAI-2C og SCAT sem mæla ástandskvíða, SCTI og SOQ sem mæla keppnisskap, OMSAT sem mælir hugræna færni og SSCI sem mælir sjálfstraust. Þátttakendur voru einnig látnir þreyta hlaupapróf. Helmingur úrtaks lenti í tilraunahóp sem fékk sex tíma í hugarþjálfun þar sem þeim var kennd kvíðastjórnun, athyglisstjórnun, skynmyndanotkun, markmiðssetning og sjálfstal. Samanburðarhópur fékk ekkert inngrip. Enginn munur var á hópum fyrir hugarþjálfun. Að hugarþjálfun lokinni voru sömu þættir prófaðir. Ástandskvíði tilraunahóps minnkaði umfram ástandskvíða samanburðarhóps. Tilraunahópur hafði einnig meira sjálfstraust, meiri hugræna færni í millihópasamanburði og bætti sig í hlaupaprófinu umfram samanburðarhópinn. Hvorki varð breyting á keppnisskapi hópanna né almennum kvíða.